…………ruck a tuck ruck a tuck ruck a tuck ruck a tuck boss tune dey fo de brothers and sisters wey wey weyyyyyy yooooooo gooooood marnin beautiful saint vincent tree seventeen on de lurve dial so jus keep-it-here gods blessing on dis beautiful isle and all de way down de grenadines gods blessing on bequia mustique canouan mayreau union marnin cack a crow coke ye ah coe coke ye ah coe an look charleen wid me dis marnin here in de studio wha sweet you last night charleen tell de listeners dem wa you get up to
marnin suggs wha do you so early
dat is fo me to know and you to find out
marnin troumaca petit bordel richmond chateaubelair to de tip of fancy and owia yow yow yow yeah yoooooo whats happenin in de land motherland fairest of isles today tomorrow and onwards
is who we have on de line dis lovely marnin charleen see charleen here wid me mixing de sweet sweet sounds going out across de nation who on de line
long guts
is long guts fo true de same long guts from bottle an glass
what you have to say long guts
ruckshan an commotion in de air tanty nenny say june and grace coming from englan soon and tanty nenny say is good dey coming for when dey come money stap see trouble now dat de house nat built foundation stone nat even lay you see you see ah ha I done tell dem so
look like lawyer time coming too
who else it have greeting fo dis marnin
nobody else right now but everybody a hustle to work and some a hustle fo work heh heh heh hustle-to-work-and-hustle-fo-work dat sweet me well leh we see if it have blackage pon de road dis marnin
how de flow dis beautiful marnin
leh we go to corporal simms fo de traffic report how it flowing dis marnin simms
marnin charleen marnin suggs marnin to everybody out in radioland is corporal simms deputy traffic division acting here traffic is flowing fair to medium on most roads is the report no sign of stoppage coming into de capital city leeward side but I just picking up one problem spot is airport a call come in on de mobile from one name of smiley airplane lick clean off de runway straight into airport supermarket
yow yow yow yow suggs here again airplane in airport supermarket when dis happen any fire who dead what break a fella shorty just phone on de mobile say airplane buss de fence jump de road and land up right inside de airport supermarket yow yow yow could only happen in beauuuuuutiful saint vincent blessed hiroona
corporal simms here again I am telling drivers not to stop to gawp go bout yo business you holdin up traffic soon as people hear what happen everybody on de damn road heading to airport
shorty phone again de plane nat in de supermarket de wing bus way de fence wheels dem in a gutter no dead only in saint vincent dat could happen eh corporal only in de motherland beauuuuutiful isle any more traffic corporal
jus tell everybody check youself before yo wreck youself
god speed……
p.n.
http://www.scrollinspace.com/article.php?story=20071105091548330